Ndërsa Kruja, Fushë-Kruja dhe rrethinat e Tiranës përballen me vatra zjarri, qeveria zgjodhi Sarandën për të shpallur se sezoni turistik është i sigurt dhe i mirëmenaxhuar. Ministri i Turizmit, Blendi Gonxhja, ministri i Brendshëm, Besfort Lamallari, dhe Drejtori i Përgjithshëm i Policisë së Shtetit, Skënder Hita, dolën në bregdet për të folur për rendin, plazhet publike, sigurinë e turistëve dhe përfitimet ekonomike të sezonit, në një moment kur disa zona të vendit po përballeshin me një tjetër lloj “sezoni”: atë të flakëve.
Gonxhja tha se vendi ndodhet në kulmin e sezonit veror dhe se shifrat janë “shumë pozitive”, jo vetëm për hyrjet e vizitorëve të huaj, por edhe për sigurinë dhe mirëmenaxhimin. Sipas tij, kjo është pasojë e gatishmërisë së Policisë së Shtetit dhe institucioneve vendore. Lamallari, nga ana e tij, e vendosi theksin te siguria e jetës së qytetarëve dhe turistëve, duke premtuar “zero paligjshmëri” dhe reagim të shpejtë të Policisë sa herë kërkohet ndihmë. Në sfondin e Sarandës, gjithçka tingëllonte si raport suksesi.
Por jashtë kuadrit të asaj daljeje, lajmet vinin me tym. Në Abazë të Krujës, zjarri u riaktivizua dhe kërkoi ndërhyrje nga ajri; në Kameras të Fushë-Krujës vijoi të ishte aktive vatra në vendgrumbullimin e mbetjeve; ndërsa në Priskë të Madhe, në rrethinat e Tiranës, flakët morën përmasa të frikshme dhe mbuluan zonën me tym. Pra, ndërsa në jug flitej për gatishmëri, në qendër të vendit ajo po testohej në kohë reale.
Kontrasti nuk kërkon shumë koment: njëra Shqipëri del në Sarandë për të reklamuar sigurinë me kamera, uniforma dhe deklarata të kujdesshme; tjetra, në Krujë, Fushë-Krujë e Priskë, pret të shohë sa shpejt mbërrin shteti kur nuk bëhet fjalë për sezon turistik, por për zjarr në derë.
