Sistemi i kujdesit shëndetësor në Mbretëria e Bashkuar po kritikohet ashpër për mënyrën si trajton punëtorët emigrantë, me akuza se politikat aktuale po krijojnë kushte që i afrohen “skllavërisë moderne”. Në një opinion të publikuar nga The Guardian, sindikata Unison paralajmëron se pa fuqinë punëtore të huaj, shërbimet shëndetësore dhe sociale do të përballeshin me kolaps.
Më shumë se një e pesta e stafit të National Health Service (NHS) përbëhet nga emigrantë, ndërsa në sektorin e kujdesit social kjo përqindje është e ngjashme dhe arrin deri në gjysmën e punonjësve në Londër. Megjithatë, sipas autorëve të shkrimit, këta punëtorë janë shndërruar në objekt kritikash politike, pavarësisht rolit të tyre jetik në funksionimin e sistemit.
Në qendër të debatit janë propozimet e qeverisë laburiste për ndryshimin e rregullave të qëndrimit të përhershëm. Masat e reja mund të detyrojnë punonjësit me paga të ulëta në sektorin publik — përfshirë kujdestarët — të presin deri në 15 vjet për leje të pacaktuar qëndrimi, në vend të pesë viteve të premtuara më parë.
Sipas Unison, këto ndryshime do të thellonin klimën e frikës dhe shfrytëzimit, pasi sistemi i vizave i lidh punonjësit drejtpërdrejt me punëdhënësit e tyre, duke i bërë ata të prekshëm ndaj abuzimeve. Raportohen raste me muaj pa pagesë, orë të gjata pune pa pushim dhe situata ku punonjësit paguhen vetëm për një pjesë të vogël të orëve të kryera.
Një punonjës i kujdesit shtëpiak nga India u shpreh se çdo bisedë me menaxherët “ndihet kërcënuese dhe shpesh përfundon me fjalën ‘vizë’”, ndërsa një tjetër theksoi se presioni emocional dhe mendor është aq i madh sa “frika bëhet hija jote”.
Sindikata argumenton se praktikat e pasigurta të punës dhe pagat e ulëta nuk janë raste të izoluara, por problem i përhapur në të gjithë sektorin. Kërcënimi i deportimit, thuhet në shkrim, i detyron shumë punonjës të heshtin përballë abuzimeve.
Në artikull theksohet se sistemi aktual i sponsorizimit ka kthyer shfrytëzimin në një tipar strukturor të kujdesit shëndetësor dhe social, ndërsa zgjatja e periudhës për qëndrim të përhershëm do t’i mbante punëtorët në këtë gjendje për edhe një dekadë.
Kritikat shkojnë edhe më tej, duke e akuzuar qeverinë se po krijon një hierarki ku profesionistët me paga të larta përfitojnë rrugë më të shpejta për qëndrim, ndërsa punonjësit e kujdesit — shpesh të cilësuar gabimisht si “me kualifikim të ulët” — mbeten të bllokuar në pasiguri.
Ndërkohë, kërkesa për kujdes vazhdon të rritet. Organizata Age UK vlerëson se rreth 2 milionë të moshuar kanë nevoja të paplotësuara për kujdes, ndërsa deri në 1.5 milionë persona me aftësi të kufizuara mund të humbasin mbështetjen e nevojshme. Sektori po përballet gjithashtu me mungesë të theksuar stafi dhe norma të larta largimi nga puna, fenomen që lidhet kryesisht me pagat e ulëta.
Përballë kësaj situate, Unison ka nisur një fushatë për reforma në sistemin e vizave dhe trajtim më të drejtë të punëtorëve emigrantë. Në fund të vitit të kaluar, rreth 700 prej tyre morën pjesë në një nga lobimet më të mëdha parlamentare të viteve të fundit, ndërsa mbi 70 deputetë kanë shprehur kundërshtimin ndaj ndryshimeve të propozuara.
Sipas shkrimit, qeveria duhet të zgjedhë mes një politike më humane dhe thellimit të një modeli që rrezikon jo vetëm të drejtat e punëtorëve emigrantë, por edhe vetë qëndrueshmërinë e sistemit shëndetësor britanik.
Lexo edhe:
Sistemi shëndetësor në prag kolapsi, 30% e stafit mjekësor punon në Gjermani
Rama në Londër, vizita e parë zyrtare e një Kryeministri shqiptar në Britani! Pasdite pritet takimi me Rishi Sunak, në fokus emigrantët e paligjshëm
Si emigrantët shqiptarë përdorin “Kushon” dhe pushtojnë tregun e kanabisit në Britani
