Nuk ka “asnjë vlerësim që ta mbështesë” pretendimin e Izraelit se Irani ka raketa me rreze të gjatë që mund të arrijnë deri në Londër, ka deklaruar një ministër i kabinetit britanik.
Sekretari i Strehimit, Steve Reed, i tha BBC-së se “nuk ka asnjë vlerësim specifik që iranianët po synojnë Mbretërinë e Bashkuar, apo edhe që mund ta bënin nëse do të donin”, pasi Forcat e Mbrojtjes së Izraelit (IDF) thanë të shtunën se Teherani kishte armë që mund të arrinin deri në 4 mijë km.
Kjo vjen pasi u bë e ditur se Irani kishte shënjestruar bazën e përbashkët ushtarake SHBA-Mbretëri e Bashkuar në Ishujt Chagos në Oqeanin Indian, rreth 3 mijë e 800 km larg nga Irani. Reed refuzoi të thoshte sa afër raketat iu afruan territorit britanik jashtë vendit, duke theksuar se nuk mund të ndante “detaje operacionale”.
Irani lëshoi dy raketa balistike drejt ishullit Diego Garcia, njëra dështoi dhe ra më herët, ndërsa tjetra u ndalua, tha Reed. Raketa e interceptuar u zhduk pasi një shkatërrues amerikan hapi zjarr me raketa ndaj saj, sipas Wall Street Journal.
Pas lajmit për sulmin e dështuar, IDF tha të shtunën se kishte zbuluar vitin e kaluar se Teherani kishte synuar të zhvillonte raketa të afta të godisnin Evropën, Azinë dhe Afrikën.
“Ne e kemi thënë: Regjimi terrorist iranian paraqet një kërcënim global. Tani, me raketa që mund të arrijnë Londrën, Parisin apo Berlinin.”
I pyetur nëse kjo ishte e vërtetë, Reed këmbënguli se “nuk ka asnjë vlerësim specifik që iranianët po synojnë Mbretërinë e Bashkuar apo edhe që mund ta bënin, nëse do të donin”.
“Ne jemi plotësisht të aftë të mbrojmë këtë vend dhe ta mbajmë të sigurt, qoftë këtu në shtëpi, apo qoftë asetet dhe shtetasit tanë në rajon,” tha ai në programin Sunday with Laura Kuenssberg, citon BBC.
I pyetur sërish për komentet e IDF-së, Reed tha: “Nuk ka asnjë vlerësim që të mbështesë atë që po thuhet.” Edhe nëse Irani do të ishte i aftë të lëshonte sulme me një rreze të tillë, sipas tij forcat e armatosura britanike do të ishin në gjendje të mbronin Mbretërinë e Bashkuar.
