Drejtori i Përgjithshëm i Policisë, Skënder Hita, ka zgjedhur drejtuesit e rinj të Policisë Rrugore në Tiranë, duke besuar tek ata zbatimin e projektit të tij për përmirësimin e shërbimit në komunitet.
Lusjan Zeqaj është emëruar shef i Komisariatit të Policisë Rrugore. Ermal Zaimi është emëruar komandant i trafikut ndërurban (komandat i linjave). Gjithashtu, me firmën e Hitës, në krye të trafikut urban në kryeqytet është emëruar Jetnor Shira, i cili e ka mbajtur edhe më herët këtë pozicion.
Këto janë ndryshimet e para që ka nënshkruar Hita, një muaj pas emërimit në krye të Policisë së Shtetit. Gjatë kësaj periudhe, kreu i ri i Policisë nuk është treguar shumë i nxituar për emërimet e reja, me shumë mundësi në pritje të miratimit të ndryshimeve në ligjin “Për Policinë e Shtetit”, i cili besohet se do të kaloj në Parlament gjatë muajit Maj 2026 dhe ku parashikohen kriteret strikte për përzgjedhjen e drejtuesve të rinj të uniformave blu.
Megjithatë, lëvizjet duket se kanë nisur. “Boldnews.al” raportoi më herët se, gjatë fundjavës së kaluar, Drejtori i Policisë, Skënder Hita, ka zhvilluar takime “informale” me disa zyrtarë të rëndësishëm të uniformave blu në rrethe.
Gjithësesi, lëvizjet e tij të para duket se kanë nisur nga Policia Rrugore dhe këto zhvillime vijnë pas një takimi zyrtar që ai ka zhvilluar me efektivët e Komisariatit të Policisë Rrugore Tiranë dhe më pas me Departamentin e Sigurisë Publike, zëvendësdrejtorët për Rendin në qarqe dhe shefat e Sektorëve të Qarkullimit Rrugor.
Në një njoftim zyrtar, të shpërndarë nga Policia e Shtetit, thuhet se “gjatë takimeve, Drejtori i Përgjithshëm kërkoi vëmendje të veçantë dhe angazhim nga të gjithë drejtuesit dhe efektivët, me qëllim rritjen e parametrave të sigurisë rrugore dhe parandalimin e çdo akti abuziv në terren”.
Ai kërkoi nga punonjësit e Policisë Rrugore që “të mos ndalohen më automjetet në akset rrugore nacionale, pa shkak, por të përdoret teknologjia, poliskani, mjetet shpejtësimatëse dhe dronët, pasi teknologjia është e ardhmja. Masat administrative të prodhuara nga këto mjete duhet të hidhen në sistem brenda ditës”.
Gjithashtu, Policia e Shtetit informon se Drejtori i Përgjithshëm, Hita, kërkoi kontroll rigoroz me grupe pune dhe plane masash në qendrat urbane, për parkimet e gabuara, manovrat e gabuara, zhurmat e gjeneruara nga marmitat e modifikuara, drejtimin e mjetit në efektin e alkoolit apo në gjendje të dehur dhe për çdo shkelje që sjell trafik dhe rrezik për sigurinë e jetës së përdoruesve të rrugës.
Sezoni turistik, siguria rrugore pranë shkollave, por edhe siguria në shkolla, ishin pika të tjera për të cilat Drejtor Hita dha porosi për vëmendje të shtuar dhe bashkëpunim e koordinim me Patrullat e Përgjithshme dhe “Shqiponjat”.
Në përfundim, Drejtori i Përgjithshëm theksoi se Policia Rrugore dhe të gjitha shërbimet e Policisë së Rendit duhet të jenë model në sjellje, reagim dhe veprim, duke ofruar një shërbim sa më të kulturuar për qytetarët dhe me integritet maksimal. /boldnews
Lexo edhe:
“Nuk kam asnjë energji për të urryer një shpirt” Beatrix ndan një mesazh të rëndësishëm me të gjithë
Klodiana Lala : Emërimet nga Ergys Agasi në Durrës, mblodhi krimin dhe politikën në një resort në Tiranë
‘KOKA’ e klanit ‘PAPA’ për të cilin punonin shefat e POLICISË, ishte vëllai i biznesmenit të ekzekutuar në Tiranë!
