Drejtoria e Përgjithshme e Policisë së Shtetit ka kërkuar ndjesë publike për një informacion të pasaktë të shpërndarë nga Drejtoria Vendore e Policisë Vlorë lidhur me protestën e zhvilluar në Zvërnec.
Sipas reagimit zyrtar, rezulton se një nga pretendimet e përfshira në njoftimin e Policisë së Vlorës ka qenë i gabuar. Konkretisht, qytetari i përmendur në komunikatën e mëparshme nuk ishte futur me forcë brenda rrethimit të kantierit, ndryshe nga sa ishte raportuar fillimisht nga policia lokale.
Për këtë arsye, Drejtori i Përgjithshëm i Policisë së Shtetit ka vendosur pezullimin e menjëhershëm nga detyra të Drejtorit të Policisë së Vlorës, duke argumentuar se besimi i publikut ndaj Policisë së Shtetit është vlera më e rëndësishme e institucionit dhe se cenimi i këtij besimi nuk mund të justifikohet në asnjë rast.
Megjithatë, Policia e Shtetit thekson se pjesa tjetër e komunikatës së Policisë së Vlorës mbetet korrekte dhe se verifikimet e kryera lidhur me territorin ku po zhvillohet konflikti në Zvërnec tregojnë se zona e rrethuar është pronë private me dokumentacion të rregullt hipotekor dhe me autorizimet ligjore përkatëse për rrethimin.
Në reagimin e saj, Policia u është drejtuar edhe protestuesve, duke theksuar se çdo pretendim mbi pronësinë ose zhvillimin e një prone private duhet të adresohet përmes rrugëve ligjore dhe në gjykatë.
“Policia e Shtetit ka për detyrë ligjore të mbrojë integritetin e çdo prone private që zotëron dokumentacion të rregullt ligjor”, thuhet në deklaratën e institucionit.
Reagimi i Policisë së Shtetit vjen pas debatit të krijuar rreth protestës në Zvërnec dhe përplasjeve të raportuara në zonën ku po planifikohet një investim i madh turistik.
Lexo edhe:
Betohet drejtori i Policisë së Shtetit/ “‘Pastrime’ edhe në radhët tona”, Skënder Hita flet për herë të parë pas marrjes së detyrës: Luftë pa kompromis ndaj korrupsionit!
Shkarkimi me bujë i Gledis Nanos, emërohet drejtori i ri i policisë së shtetit (Emri)
Për klikime, media abuzoi në raportimin e ngjarjes te shkolla Fan Noli
