Gazetarja Klodiana Lala ka zbuluar detaje të reja mbi aktivitetin e grupit kriminal që, sipas SPAK, drejtohej nga Franc Çopja dhe Ervis Çela. Të dy akuzohen për drejtimin e një organizate që trafikonte kokainë nga Amerika e Jugut drejt Europës.
E ftuar në emisionin “Opinion”, në TV Klan, Lala foli për mënyrën se si funksiononte grupi, konfliktet mes grupeve kriminale dhe mënyrën e ruajtjes së parave të përfituara nga trafiku i drogës.
Sipas gazetares, një nga personat kryesorë të organizatës ishte Ervis Çela, i cili kishte jetuar për 25 vite në Paraguai dhe nuk ishte bërë i njohur për autoritetet deri në arrestimin e tij në Qeparo.
“Në këtë organizatë që ju nxorët, kryesori është Ervis Çela”, deklaroi Lala.
Gazetarja u ndal edhe te konflikti mes Franc Çopjas dhe Erion Alibejt, i cili, sipas saj, nisi për shkak të trafikut të drogës në Britaninë e Madhe.
Ajo tha se përplasjet mes dy grupeve çuan në masakrën e Bradasheshit dhe më pas në një seri vrasjesh.
“Franc Çopja ka një sërë vrasjesh në përballjen me Erjon Alibej, që është kreu i një grupimi kriminal. Konflikti nisi për çështjet e drogës në Britaninë e Madhe, ndodhi masakra e Bradasheshit dhe më pas u bë sërish seri vrasjesh”, u shpreh gazetarja.
Një tjetër detaj që Lala zbuloi lidhet me sasitë e mëdha të parave që dyshohet se qarkullonin brenda organizatës.
Sipas saj, në një moment anëtarëve të grupit u ishte prishur makina e numërimit të parave dhe kishin kërkuar një tjetër pajisje.
“Ore, këtu ka një problem. Atyre u prishet makina e numërimit të parave dhe kanë kërkuar një makinë për t’i numëruar. Këtë e ke në dosje”, tha Lala.
Gazetarja tregoi gjithashtu se Franc Çopja kishte përdorur kriptomonedhat dhe lingotat e arit për ruajtjen e pasurisë së dyshuar kriminale.
“Franc Çopja është i pari që futi kriptomonedhat dhe lingotat e arit. Këta, për herë të parë, i groposën në ullinj. Pasuria e sekuestruar është 9.2 milionë euro”, deklaroi ajo.
Sipas SPAK, pasuritë e sekuestruara në kuadër të hetimeve ndaj këtij grupi arrijnë vlerën e 9.2 milionë eurove.
Ndërkohë, hetimet kanë dokumentuar pesë raste të sekuestrimit të sasive të mëdha të kokainës në portet europiane.
Në dhjetor 2019, në Rotterdam të Holandës, u sekuestruan rreth 255 kilogramë kokainë. Në prill 2020, në Barcelonë të Spanjës, u kapën rreth 495 kilogramë, ndërsa në maj të po atij viti, në Rotterdam, u sekuestruan edhe 300 kilogramë të tjerë.
Në nëntor 2020, në Holandë, u sekuestruan rreth 600 kilogramë kokainë. Rasti më i madh i dokumentuar lidhet me shkurtin e vitit 2021, kur në portin e Hamburgut, në Gjermani, u sekuestruan rreth 17 tonë kokainë.
Lexo edhe:
Kullat e kokainës, Klajdi Merkaj futi paratë e Franc Copjas te Mandarine Drive , Endri Merkaj “qep gojën”, si u ndërtua kompleksi te QSUT dhe kulla te Ekonomiku
“E gjetëm poshtë urës dhe…”, Klodiana Lala tregon historinë tronditëse dhe zbulon detaje nga ngjarja në Shkodër (VIDEO)
Tritoli që terrorizoi Sarandën, Klodiana Lala zbulon detaje tronditëse. Kush po kërcënon biznesin?
