Forcat speciale kanë shoqëruar mbrëmjen e sotme një person të dyshuar për lidhje me atentatin e 11 nëntorit në Rinas, ku u vranë Gilmando Dani dhe efektivi i AMP-së, Muçi Shaljani.
Personi me inicialet B.Xh. është dërguar në Drejtorinë e Policisë së Tiranës për t’u marrë në pyetje, pa iu komunikuar masë ndalimi, ndërsa dëshmia e tij pritet të ndihmojë në zbardhjen e ngjarjes së rëndë.
Atentati ndodhi në një nga pikat më të sigurta pranë aeroportit të Rinasit, pikërisht në rrethrrotullim, në momentin kur aty nuk ndodhej asnjë patrullë policie. Gilmando Dani kishte zbarkuar pak minuta më herët nga një fluturim nga Barcelona, ku kishte qëndruar për katër ditë, dhe autoritetet spanjolle ende po verifikojnë lëvizjet dhe kontaktet e tij gjatë udhëtimit.
Sipas hetimeve, autorët qëlluan me saktësi profesionale dhe u larguan vetëm pasi u siguruan se shënjestra e tyre ishte eliminuar, ndërsa Shaljani, i plagosur rëndë, ndërroi jetë pak më vonë në spital.
Efektivi Muçi Shaljani ishte pjesë e Forcës së Posaçme Operacionale të AMP-së prej pak javësh, ndërsa pranimi i tij në këtë strukturë, pa certifikatën e nevojshme të sigurisë, u kthye në objekt hetimi, duke çuar në pranga dy punonjës policie të Komisariatit nr.3, që kishin hartuar dokumentet, pa përfshirë të gjitha të dhënat.
Por, Gjykata e Tiranës, në seancën e 15 nëntorit, i cilësoi arrestimet e tyre të pabazuara në ligj dhe nuk vendosi asnjë masë sigurimi, pavarësisht kërkesës së Prokurorisë për “detyrim paraqitje” dhe “ndalim të daljes nga vendi”.
Vetëm tre ditë pas ngjarjes, policia zbuloi në Fushë-Krujë një sasi të madhe armësh dhe shpalli në kërkim pronarin e banesës, Ylli Zalla, i dyshuar si bashkëpunëtor i grupit që kreu atentatin.
Sipas të dhënave të para, automjeti “Toyota” që u përdor në vrasje dhe më pas u dogj në fshatin Halil, dyshohet se ka dalë nga banesa e Ylli Zallës.
Autoritetet ende nuk kanë identifikuar persona të tjerë të përfshirë në ngjarje, ndërsa hetimet po vijojnë me intensitet të lartë për të zbuluar urdhëruesit dhe ekzekutorët e atentatit.
Lexo edhe:
Vrasja e Gilmando Danit në Rinas, reagon zyrtarisht policia. Zbulohet emri i personit që mbeti i plagosur
“Si togë pushkatimi, 3 vetë me kallashnikovë”, gazetari tregon dinamikën e vrasjes në Rinas: Grupi i Gilmando Danit ka pasur hesape të hapura me…
Ekzekutimi i Gilmando Danit/ Ja çfarë ka më dorë policia, 48 orë pas atentatit në Rinas
