‘E ka marrë një të madhe’/ Besnik Bami në dosjen “Balluku”, 70 milionë euro tendera të dyshimtë

Biznesmeni Besnik Bami, fans i Sali Berishës, rezulton pjesë e dosjes së SPAK për zv/kryeministren Belinda Balluku, e cila bashkë me Evis Berberi i referohen me ‘BB’. Bami rezulton pjesë e listës së përfituesve të mëdhenj të fondeve publike, kryesisht përmes tenderave klientelistë dhe me flamur të kuq korrupsioni, por ka përfituar edhe leje për kulla, me të cilat dyshohet se pastron para.

Përmes kompanisë së ndërtimit Bami shpk, gjatë 10 viteve të fundit, Besnik Bami ka marrë i vetëm dhe në bashkëpunim mbi 70 milionë euro tendera publikë. Vetëm gjatë 5 viteve të fundit, në llogarinë e kompanisë së ndërtimit Bami shpk kanë kaluar mbi 36 milionë euro para publike, produkt i kontratave me institucionet e shtetit shqiptar.

Rreth 80 % të tenderave të përfituara nga Bami janë shënjuar me flamurin e kuq të alarmit për shkak të mungesës së konkurrencës dhe diferencës së papërfillshme mes fondit limit dhe ofertës fituese, situacione false dhe duke ngritur dyshime të forta për manipulime dhe paracaktim të fituesit me pazar në tavolinë, duke ndarë paratë publike sipas roleve.

Mashtrimi me zbatimin e kontratave, situacione false, kontrata fiktive dhe prokurim parash, është një tjetër fenomen masiv i konstatuar edhe nga Kontrolli i Lartë i Shtetit, por edhe nga hetimet e SPAK-ut. Dosja e SPAK për tenderat e rrugëve të Shqipërisë ka ekspozuar mekanizimin korruptiv të ndarjes së parave publikë për klientët biznesmenë si plaçkë lufte.

Ndërkaq, paratë e përfituara me klientelizëm nga buxheti i shtetit biznesmeni Bami i ka investuar në pasuri të paluajtshme, sidomos në kulla, për të cilat Departamenti Amerikan i Shtetit ka ngritur alarmin në raportet zyrtare si forma kryesore e pastrimit të parave.

Besnik Bami në dosjen e SPAK-ut për Ballukun

Biznesmeni Besnik Bami besohet se është perosazhi i famshëm në dosjen e SPAK-ut për Belinda Ballukun. Besnik Bami referohet me ‘BB’, iniciale të cilat kanë prodhuar shumë polemika dhe interpretime. Zonja Balluku i referohet ‘BB’-së me epitete të rënda, duke treguar se tenderat për biznesmenin janë imponuar nga një tjetër dorë, pa dëshirën e saj, me shumë gjasa nga kryeministri Edi Rama, i cili dyshohet se ka ndarë tenderat e mëdhenj edhe për Ram Gecin, Bashkim Ulajn, Pëllumb Salillarin etj.

Balluku: “I ke hapur ti? Epo një do ta marri ky super k.. Ia ka premtuar R”

Në orën 18:11, Evis Berberi: “Po bb e kishte një të madhe, unë i ndava që të akomodonim sa më shumë”.

Në orën 18:11, Belinda Balluku: “S’më pëlqen fare qe une nuk di cfare ben ti”.

Në orën 18:11, Evis Berberi: “Po kë të dojë”.

Në orën 18:18, Belinda Balluku: “Jo kë të dojë jo”.

Në orën 18:18, Evis Berberi: “Të vi në…”

Nga ky fragment, sado i shkurtër, del një dinamikë marrëdhënieje që shkon përtej komunikimit institucional normal dhe hyn në territorin e menaxhimit informal të parasë publike.

Shprehja e Evis Berberit: “bb kishte një të madhe, unë i ndava që të akomodonim sa më shumë” nuk është gjuhë teknike, as administrative. Është gjuhë pazari, që tregon se si ndahen fondet publike për klientët biznesmenë. Fjalë si “një të madhe”, “i ndava”, “të akomodonim” sugjerojnë një fond të përqendruar, i cili copëtohet qëllimisht, për shpërndarje sa më të gjerë interesash.

Kjo tregon se Bensik Bami ka marrë një tjender të madh dhe se tenderi tjetër duhet të ndahet. Reagimi i Belinda Ballukut: “S’më pëlqen fare që unë nuk di çfarë bën ti” nuk është reagim i një eprori që kërkon transparencë. Replika: “Jo kë të dojë jo” tregon dikë që pret të jetë në dijeni, jo për të ndaluar, por për të kontrolluar rrjedhën.

Nuk duket marrëdhënie as thjesht ministre–vartës, as thjesht politike. Është më afër një marrëdhënie bashkëmenaxhimi joligjor ku vendimet për paratë publike merren përmes koordinimit personal, jo procedurës. Këtu nuk flitet për gabime administrative, por si “ndahen” paratë publike, larg dokumenteve, larg konkurrencës, larg transparencës./ Prapaskena.com