Administrata Tatimore ka nisur të përdorë praktika të reja kontrolli, duke kaluar nga verifikimet dokumentare te sekuestrimi i pajisjeve elektronike të subjekteve private.
Në këtë kuadër, Tatimet kanë sekuestruar disa kompjuterë në agjenci imobiliare, gjatë kontrolleve të ushtruara ditët e fundit për hetimin e dyshimeve për evazion fiskal në sektorin e ndërtimit.
Sipas njoftimit zyrtar, veprimet janë kryer nga strukturat e Hetimit Tatimor, në zbatim të Planit Sektorial të Ndërtimit. Kontrollet janë fokusuar në agjenci imobiliare dhe kanë përfshirë verifikimin e dokumentacionit financiar dhe të marrëdhënieve të punës.
Administrata Tatimore bëri të ditur se kontrollet janë ushtruar në 9 agjenci imobiliare, ku janë konstatuar shkelje që lidhen me mosdeklarimin e punonjësve, mospasqyrimin e pagave reale dhe dyshime për evazion fiskal në çmimet e shitjes së apartamenteve.
“Nga të dhënat e marra nga njësitë kompjuterike rezulton se ka dyshime për evazion tatimor në çmimet e shitjes së apartamenteve”, thuhet në njoftimin e Tatimeve.
