Karabinierët gjetën dyqind kilogramë kokainë në apartamentin e tij në Tor Vergata, Romë, një sasi që do të kishte vlerën 16 milionë euro nëse do të hidhej në treg. Bëhe fjalë për 22-vjeçarin Kristian Preni i arrestuar dje në Itali dhe që aktualisht ndodhet në burgun e Rebibbias. Por 22-vjeçari ka mbrojtur veten në dëshminë e tij të parë. “U përfshiva në një situatë të keqe sepse familja ime është e varfër, jeton në kushte të dëshpëruara dhe shumë të vështira”, i tha ai gjyqtarit hetues.
“Kur më ndaluan, po kthehesha në Shqipëri”, shtoi ai. “Është hera e parë që bëj diçka të tillë. Arma nuk është e imja; nuk e kam blerë dhe as përdorur kurrë”, tha ai. Një pistoletë Beretta 92 e vjedhur dhe 30,000 euro “cash” u gjetën gjithashtu në apartament.
Babai i tij ishte alkoolik dhe nëna e tij e papunë. Kështu e përshkroi ai situatën e vështirë familjare që do ta bënte atë të bëhej një gur shahu për trafikantët e drogës. “Kisha qenë në Itali për periudha të shkurtra në të kaluarën, por u transferova në Romë gjashtë muaj më parë dhe kërkova punë si hidraulik,” vazhdoi ai.
Kristian, për të cilin gjyqtari hetues urdhëroi paraburgim, po mbrohet nga avokatja italiane Dalila Milano: “Ne do të apelojmë në Gjykatën e Apelit për të kërkuar një masë paraprake jo-burgosëse,” njoftoi ajo. Megjithatë, 22-vjeçari nuk ka zbuluar asgjë rreth asaj se kush e punësoi atë ose udhëheqjen e organizatës kriminale së cilës i përkiste.
Ai u ndalua për një kontroll jashtë shtëpisë së tij në Tor Vergata nga karabinierët, të cilët dyshonin për sjelljen e tij. Ai kishte një shumë të madhe parash në xhepa dhe çantë shpine, por ishte i listuar si i papunë. Oficerët më pas vazhduan të kontrollonin shtëpinë, në konsultim me zyrën e prokurorit të Romës.
Pasi u bastisën, oficerët u gjendën përballë një qendre të vërtetë droge, e përdorur si bazë logjistike për ruajtjen dhe shpërndarjen e drogës. 191 blloqe kokaine, me një peshë totale prej dyqind kilogramësh, ishin fshehur në cepa të ndryshëm të shtëpisë. Një shenjë identifikimi e veçantë shënonte llojet e ndryshme të narkotikëve, gati për t’u hedhur në treg, ku do të sillnin afërsisht 16 milionë euro.
22-vjeçari gjithashtu shmangu zbulimin gjatë transportimit të ngarkesave të drogës falë një mekanizmi të sofistikuar. Ai e kishte pajisur makinën e tij me një fund të rremë që hapej duke futur një kod në një tastierë dhe duke rrotulluar çelësin e ndezjes.
Lexo edhe:
Kokainë, zhvatje dhe kërcënime/ Arrestohen bashkëpunëtorët e “Zotit” shqiptar të drogës në Itali
Gjuha e trupit e tradhtoi, arrestohet “turisti” shqiptar në Itali, policia i gjen 118 doza kokaine
Kokainë me nëndetëse nga Panamaja në Itali, 29 në pranga. Përgjimi i bosit shqiptar që zbuloi skemën: Nën ujë është 100% e sigurt
