Seanca e parë e legjislaturës së re parlamentare ka nisur me debate të forta dhe tensione politike. Kreu i Partisë Demokratike, Sali Berisha, zaptoi foltoren që në hapje të mbledhjes, edhe pse sipas rregullores nuk lejohen diskutime.
Opozita refuzoi të paraqiste emrat e saj për Komisionin e Verifikimit të Mandateve, duke bllokuar procedurën e parë formale të Kuvendit. Pas përplasjesh verbale dhe situatës së krijuar, seanca u shty dhe pritet të rifillojë në orën 17:00.
Seanca u drejtua nga deputeti më i vjetër në moshë, Vasil Llajo, pasi Berisha dhe Tritan Shehu refuzuan të marrin këtë rol. Në këtë Kuvend janë ulur për herë të parë 72 deputetë të rinj, por nisja e legjislaturës dëshmoi se tensionet e vjetra politike vijojnë.
Në sallë ishin të pranishëm ambasadorë të vendeve kryesore, përfaqësues të komuniteteve fetare dhe drejtues të institucioneve të drejtësisë, duke i dhënë seancës një peshë simbolike në nisjen e punimeve.
Nga foltorja, Berisha akuzoi mazhorancën për manipulim të listave dhe i quajti deputetët e PS-së “prestanome”. Ai e cilësoi parlamentin jolegjitim, duke e quajtur “parlament të karteleve të drogës dhe miliardave të vjedhura”.
Ndërkohë, kreu i grupit parlamentar të PS, Taulant Balla, paraqiti emrat e mazhorancës për Komisionin e Verifikimit të Mandateve, ku përfshihen Milva Ikonomi, Olsi Komnici, Aulona Bylykbashi, Hatixhe Konomi dhe Alkend Balla. Komisioni pritet të zgjedhë kryetarin dhe më pas të verifikojë mandatet e 140 deputetëve.
Berisha deklaroi se opozita do të vazhdojë betejën, duke e cilësuar pjesëmarrjen e saj si provë të ekzistencës së demokracisë. Ai paralajmëroi se zgjedhjet e ardhshme, sipas tij, nuk mund të jenë të lira me Edi Ramën në pushtet dhe nuk përjashtoi bojkotin si skenar.
Kështu, nisja e punimeve të Kuvendit tregoi se edhe pse me përbërje të re, tensionet politike të vjetra mbeten të njëjtat.
