Numri i të sëmurëve kronikë në Shqipëri po rritet nga viti në vit, por në të njëjtën kohë po ndodh një paradoks i rrezikshëm: barnat që rimbursohen nga shteti po pakësohen, ndërsa barra financiare për pacientët po rëndohet gjithnjë e më shumë.
Të dhënat zyrtare tregojnë se vetëm gjatë vitit 2024 janë rimbursuar rreth 223 mijë barna më pak krahasuar me një vit më parë. Arsyeja kryesore lidhet me heqjen nga lista e rimbursimit të disa barnave të kushtueshme, të cilat përdoren për trajtimin e sëmundjeve kardiovaskulare, një nga problemet më të përhapura shëndetësore në vend.
Në total, gjatë vitit 2024 janë lëshuar mbi 1 milion receta, konkretisht 1,005,417 receta. Por edhe këtu shifrat flasin për një tkurrje reale të mbështetjes shtetërore: vlera mesatare e rimbursimit për recetë ka rënë në 3,841 lekë, nga 4,108 lekë për recetë që ishte në vitin 2023.
Ndërsa Ministria e Shëndetësisë deklaron se listat e barnave të rimbursuara janë zgjeruar, të dhënat që dalin nga qarkullimi real i recetave në tregun farmaceutik tregojnë një tjetër pamje: të sëmurët po shtohen, kostot për medikamentet po rriten, ndërsa mbulimi i rimbursimit po bëhet gjithnjë e më simbolik.
Në praktikë, për mijëra pacientë kronikë, rimbursimi mbulon vetëm një pjesë minimale të trajtimit, shpesh pothuajse të papërfillshme. Diferenca paguhet nga xhepi i qytetarëve, duke e kthyer sëmundjen jo vetëm në një betejë shëndetësore, por edhe në një barrë të rëndë ekonomike.
Në një vend ku plakja e popullsisë dhe sëmundjet kronike janë në rritje, tkurrja “de facto” e barnave të rimbursuara po krijon një hendek gjithnjë e më të thellë mes nevojës reale për trajtim dhe mbështetjes që ofron shteti.
