Rakip Suli është një nga kryebashkiakët që propagandon çdo punë që bën në Bashkinë Kamëz.
Një vit para zgjedhjeve lokale, duket se Suli po bën përgatitjet për të përforcuar zyrën e medias me pajisje dhe mjete të reja, të cilat do t’i blejë me buxhetin e institucionit që drejton.
Bashkia Kamëz ka shpallur një tender me objekt “furnizim dhe vendosje pajisjesh audio-video”. Procedura është futur në kategorinë “vlerë e vogël”, që do të thotë se oferta do të paraqitet nga operatorët që shfaqin interes, dhe bashkia do të paguajë pasi të përmbushen kërkesat.
Sipas dokumenteve, kërkohet të blihen 3 kamera PTZ, një kontroller PTZ për kamera, dhe një mixer audio me 12 kanale.
Bashkia ka kërkuar gjithashtu kufje profesionale, 5 mikrofonë për podcasting dhe 5 krahë mbajtës për mikrofonë.
Gjithashtu, kërkohen karta transmetimi, 3 tripodë video profesionalë me kokë të lëvizshme, dritë LED profesionale për video dhe foto, si dhe 4 drita LED dhe 6 softbox katrorë për studio.
Bazuar në pajisjet që kërkon bashkia e drejtuar nga Rakip Suli, vlera që do të shpenzohet nuk do të jetë e vogël. Në vend që këto fonde të shpenzohen për nevojat e qytetarëve, kryebashkiaku i Kamzës e sheh si prioritet imazhin e tij propagandistik dhe publikimin e kronikave sa më cilësore.
Suli duket se kërkon të konkurrojë Edi Ramën dhe Erion Veliajn, pasi mjafton të futesh në rrjetet e tij sociale dhe gjen të njëjtin algoritëm postimesh si ata, me video për çdo lyerje që bën, apo duke u shfaqur për të shpjeguar punët me veprime e mimika, në tentativë për të kopjuar kryebashkiakun e Tiranës.
Lexo edhe:
Rakip Suli sfidon hapur SPAK -un, tender skandaloz: Afera, 290 milion lekë për biznesmenin e preferuar
Kamëz , “gangsteri” Rakip Suli tregon se nuk pyet për SPAK: Tender milionësh nipit të Sadri Abazit (Sadriut dmth)
Rakip Suli i jep tender të ri biznesmenit Bujar Murati të Euro Alb që u arrestua me Fatos Tushen, pse ndryshuan emrin në LIS KONSTRUKSION
