Flet i përlotur babai i 8-vjeçarit të lënduar në tragjedinë e Durrësit: Djali kërkon shokët

Babai i 8-vjeçarit të plagosur në aksidentin tragjik të ndodhur dy ditë më parë në Durrës ka folur mes lotësh nga Spitali i Traumës në Tiranë, ku djali i tij po trajtohet pas plagëve të marra nga përplasja që u mori jetën dy fëmijëve të tjerë.

Në një lidhje direkte për emisionin “Opinion”, Ardian Meslani tha se vogëlushi ndodhet jashtë rrezikut për jetën, por po i nënshtrohet një ndërhyrjeje kirurgjikale në Spitalin e Traumës.

“Djali tani është jashtë rrezikut për jetën, jemi në mes të një ndërhyrjeje”, u shpreh ai.

Meslani tregoi se familja po kalon një gjendje tepër të rënduar psikologjike, ndërsa tha se edhe dy fëmijët e tjerë që ndodhen në shtëpi kanë nevojë për ndihmë psikologjike.

Ai deklaroi se familja nuk ka marrë asnjë mbështetje psikologjike nga institucionet.

“Jo fare absolutisht”, tha ai, kur u pyet nëse i janë ofruar psikologë për të ndihmuar familjen.

Një nga momentet më prekëse të rrëfimit ishte kur babai tregoi se djali i plagosur kërkon vazhdimisht shokët e tij, pa e ditur ende se ata kanë humbur jetën në aksident.

“Vetëm diçka më ka thënë, kërkon shokët e vet dhe thotë: erdhi makina me shpejtësi, na mori përpara”, rrëfeu Meslani.

Ai shtoi se familja nuk i ka treguar ende vogëlushit për fatin tragjik të dy fëmijëve të tjerë.

Për shoferin që shkaktoi aksidentin në gjendje të dehur, Meslani tha se e njihte dhe se kishte bërë disa denoncime për mënyrën e rrezikshme të drejtimit të automjetit.

“Të marrin telefonin ta shohin. Jo vetëm unë, por gjithë lagjia. Vinte një patrullë, kalonte, e shihte të parkuar dhe ikte”, deklaroi ai.

Ngjarja e rëndë ndodhi më 3 maj në Durrës, kur një 57-vjeçar në gjendje të dehur përplasi tre fëmijë, duke shkaktuar vdekjen e dy prej tyre dhe plagosjen e një tjetri.

Aksidenti shkaktoi reagime të forta publike dhe debate mbi sigurinë e fëmijëve në rrugë dhe hapësira publike. Çështja u diskutua edhe në Kuvend, ku mazhoranca paralajmëroi ndryshime në Kodin Penal, ndërsa Policisë së Shtetit iu kërkua vigjilencë më e lartë ndaj drejtuesve problematikë dhe personave që shkelin rregullat e qarkullimit rrugor.

Lexo edhe:

“Dua të bëhem si Ronaldo”, babai i 14-vjeçarit flet i përlotur: Një engjëll i vërtetë, kishte një humor që i bënte njerëzit për vete Nënkomisari i Policisë së Durrësit dhe djali i tij qëllojnë me armë drejt 29-vjeçarit, arrestohet babai, në kërkim i biri “Nuk kam asnjë energji për të urryer një shpirt” Beatrix ndan një mesazh të rëndësishëm me të gjithë