Një skandal abuzimi me fëmijë ka tronditur Francën, ndërsa autoritetet po hetojnë dhjetëra kopshte publike dhe shkolla fillore për raste dhune, sulmesh seksuale dhe përdhunimesh ndaj të miturve.
Sipas zyrës së prokurorit të Parisit, hetimet po zhvillohen në 84 kopshte, rreth 20 shkolla fillore dhe disa qendra kujdesi ditor, pas më shumë se 100 ankesave të paraqitura nga prindërit. Rastet përfshijnë fëmijë të moshës tre dhe katër vjeç.
Në qendër të hetimeve janë të ashtuquajturit “mbikëqyrës shkollash”, punonjës që kujdesen për fëmijët gjatë drekës, pushimeve ose aktiviteteve pas mësimit.
Në Francë, këta punonjës nuk punësohen nga vetë shkollat, por nga bashkitë dhe autoritetet lokale, shpesh pa trajnim pedagogjik apo arsim specifik për punën me fëmijët.
Prindërit dhe avokatët pretendojnë se prej vitesh janë përpjekur të denoncojnë situatat, por nuk janë marrë seriozisht.
Akuzat përfshijnë abuzim verbal dhe fizik, me fëmijë që dyshohet se janë bërtitur, shtyrë apo ndëshkuar, si edhe raste shumë të rënda të abuzimit seksual.
Sipas avokatëve, bëhet fjalë për raste përdhunimi të fëmijëve tre dhe katër vjeç, duke e cilësuar situatën si një “skandal të madh” dhe një dështim serioz të sistemit të kontrollit dhe rekrutimit.
Ata paralajmërojnë se shumë prej fëmijëve të përfshirë po shfaqin trauma të forta psikologjike dhe frikë nga ambienti shkollor.
“Ky është një skandal i madh”, tha avokati Florian Lastelle, i cili përfaqëson tre familje nga Parisi që kanë bërë kallëzim në polici për abuzimin e dyshuar të fëmijëve të tyre.
“Sistemi arsimor publik është një burim krenarie për Francën, por fatkeqësisht sot nuk mund të thuhet se garanton sigurinë e fëmijëve,” shtoi ai.
Ndërkohë, avokati Louis Cailliez, i cili përfaqëson dy familje pariziene, deklaroi se në shkurt kishte depozituar kallëzime për përdhunimin e dyshuar të dy fëmijëve që frekuentonin një çerdhe gjatë vitit 2025.
Në një nga rastet, një vajzë trevjeçare dyshohet se është përdhunuar nga një asistent në një shkollë në perëndim të Parisit. Në një rast tjetër, një djalë trevjeçar dyshohet se është abuzuar nga i njëjti person, i cili më pas ishte transferuar në një tjetër shkollë, pavarësisht akuzave të mëparshme për dhunë ndaj fëmijëve.
“Një mëngjes, djali refuzoi të hynte në shkollë dhe shpërtheu në lot para hyrjes. Nëna e tij qante, ndërsa drejtori u detyrua ta merrte me forcë për ta futur brenda. Në atë moment askush nuk e dinte arsyen e vërtetë të reagimit të tij,” tregoi avokati.
Sipas tij, pasojat psikologjike dhe fizike te fëmijët janë të rënda dhe vazhdojnë ende.
“Për prindërit është një torturë e përditshme. Ata duan që hetimet të vazhdojnë dhe të zbulohet e gjithë shkalla e këtyre krimeve,” tha ai.
Ndërkohë, në ditët në vijim pritet të nisë në Paris gjyqi ndaj një drejtori shkolle të akuzuar për abuzim seksual të pesë fëmijëve të moshës tre deri në pesë vjeç. Muajin e ardhshëm pritet gjithashtu vendimi për një tjetër rast, ku një drejtor 47-vjeçar akuzohet për abuzim seksual ndaj nëntë vajzave 10-vjeçare në Paris.
