Lënia e duhanit ul ndjeshëm rrezikun e zhvillimit të kancerit të mushkërive, por kalimi nga cigaret tradicionale te cigaret elektronike mund të zbehë një pjesë të këtyre përfitimeve. Ky është përfundimi i një studimi të ri të publikuar në revistën shkencore Nature Medicine nga studiues të Koresë së Jugut.
Analiza përfshiu rreth 4.5 milionë duhanpirës dhe ish-duhanpirës, duke shqyrtuar ndikimin e përdorimit të cigareve elektronike tek personat që kishin hequr dorë nga duhani. Gjatë një periudhe vëzhgimi që përfshiu rreth 24 milionë persona-vite, u regjistruan mbi 36 mijë raste me kancer të mushkërive dhe rreth 12.800 vdekje të lidhura me sëmundjen.
Sipas studiuesve, ish-duhanpirësit që përdornin cigare elektronike kishin rreth 50% më shumë rrezik për të zhvilluar kancer të mushkërive krahasuar me ata që nuk përdornin asnjë produkt nikotine. Po ashtu, rreziku i vdekjes nga kanceri i mushkërive rezultoi pothuajse dy herë më i lartë, ndërsa rreziku i vdekjes nga të gjitha shkaqet ishte rreth 20% më i madh.
Rreziku ishte veçanërisht i lartë tek personat e konsideruar me risk të shtuar, si ish-duhanpirësit nga 50 deri në 80 vjeç dhe ata me histori të gjatë ekspozimi ndaj duhanit.
Autorët e studimit theksojnë se përdorimi i cigareve elektronike pas lënies së duhanit mund të zvogëlojë efektet mbrojtëse që sjell ndërprerja e plotë e konsumit të nikotinës. Sipas tyre, rezultatet i shtohen numrit në rritje të studimeve që vënë në dyshim pretendimin se cigaret elektronike janë një alternativë e sigurt ndaj duhanit tradicional.
Megjithëse nevojiten studime të tjera për të kuptuar më mirë efektet afatgjata të avullimit, studiuesit rekomandojnë që ish-duhanpirësit të shmangin edhe cigaret elektronike nëse synojnë të ulin sa më shumë rrezikun e kancerit të mushkërive.
Lexo edhe:
STUDIMI/ IQOS dhe cigaret elektronike rrisin rrezikun për kancer dhe atak kardiak, dëmi më i madh se cigaret normale
Mashtrim me IQOS , cigaret me ngrohje dëmtojnë njëlloj si cigaret normale: Studimi zbulon skandalin në Shqipëri
Mjekët japin alarmin: KUJDES me cigaret elektronike, lëshojnë grimca kancerogjene
