Jonaid Myzyri i Operatorit të Blerjeve të Përqendruara, vijon të firmosë tendera miliona eurosh në fushën e shëndetësisë, ku gara duket se është thjesht një koncept formal. Së fundmi, ky institucion ka mbyllur procedurën për blerjen e materialeve mjekësore specifike për Shërbimin e Neurokirurgjisë në Spitalin Universitar të Traumës. E thënë më thjesht, bëhet fjalë për pajisje jetike për operacionet e trurit dhe shtyllës kurrizore për dy vitet e ardhshme, me një fond limit që prek shifrën e 3 milionë eurove.
Për një kontratë të këtyre përmasave, që tejkalon kufijtë e lartë monetarë, logjika dhe ligji do të kërkonin një garë mes kompanish për të siguruar çmimin më të mirë. Por institucioni i drejtuar nga Myzyri ka zgjedhur rrugën më të shkurtër. Për këtë procedurë është paraqitur vetëm një ofert, ajo e kompanisë “O.E.S DISTRIMED” me ofertën sa 99.6% e fondit limit. Pa pasur asnjë rival përballë, OPB e ka shpallur fituese kompaninë në fjalë.
Në vend që të anulonte procedurën ose ta shtynte atë për të nxitur konkurrencën e tregut, OPB zgjodhi t’ia falte kontratën operatorit të vetëm. Ky subjekt nuk është një emër i panjohur në korridoret e shëndetësisë publike, por një nga përfituesit më të mëdhenj të fondeve të saj.
Kompania, e cila zotërohet nga Ermal Rizaj dhe Orjada Jaho, vetëm në 7 vitet e fundit ka përfituar qindra tendera në këtë sektor. Sipas të dhënave të Open Spending, përgjatë shtatë viteve të fundit, ky operator ka arkëtuar rreth 60 milionë euro nga buxheti i shtetit.
Megjithatë, pikëpyetjet e mëdha mbeten mbi mënyrën se si jepen këto para, ku mungesa e garës ngre dyshime të forta mbi menaxhimin e fondeve publike. Përgjegjësia kryesore për këtë praktikë bie mbi Jonaid Myzyrin, i cili mori drejtimin e Operatorit të Blerjeve të Përqendruara pa mbyllur ende plotësisht llogaritë e tij me SPAK-un.
Lexo edhe:
Jonaid Myzyri nuk pyet për SPAK: Pas Fushës, i jep edhe Arbër Abazit tenderin 1.1 mln euro për pastrimin e bregdetit duke skualifikuar ofertat më të ulëta
Ish-punonjësi i Sadri Abazit në krye të KPP nuk pyet për gjykatën, Jonaid Myzyri bllokon në mënyrë arbitrare rikonstruksionin e Spitalit të Dibrës
Largimi i Arlinda Pogajt, Jonaid Myzyri emërohet në krye të Operatorit të Blerjeve të Përqendruara
