Komisioni Qendror i Zgjedhjeve ka nisur përgatitjet për zgjedhjet vendore të vitit 2027, duke hapur një sërë tenderash për sigurimin e materialeve zgjedhore. Por, dy prej procedurave kanë përfunduar në duart e së njëjtës kompani, e cila rezulton e lidhur me një biznesmen të përfshirë më parë në hetime për çështje të ndryshme.
Bëhet fjalë për kompaninë “Vitanet Albania”, në pronësi të Sokol Topçiut, e cila ka fituar dy kontrata nga institucioni i drejtuar nga Ilirjan Celibashi, për furnizimin me bojë timbruese dhe kuti votimi.
Tenderi më i fundit është finalizuar më 21 tetor 2026 dhe ka si objekt blerjen e kutive të votimit që do të përdoren në procesin zgjedhor.
Sipas njoftimit të fituesit, KQZ ka përzgjedhur kompaninë “Vitanet Albania”, me një ofertë prej 14.4 milionë lekësh pa TVSH.
Në procedurë rezulton të ketë marrë pjesë edhe shoqëria “Kristalina KH”, por kjo e fundit nuk ka paraqitur ofertë ekonomike.
Për pasojë, kompania e Topçiut ka qenë e vetmja me ofertë financiare në garë, duke ngritur pikëpyetje mbi konkurrencën reale në këtë procedurë prokurimi.
Por kjo nuk është kontrata e vetme që “Vitanet Albania” ka siguruar nga Komisioni Qendror i Zgjedhjeve gjatë përgatitjeve për zgjedhjet e ardhshme.
Vetëm pak javë më parë, e njëjta kompani fitoi edhe tenderin për blerjen e bojës timbruese, një nga materialet që përdoren për identifikimin e votuesve gjatë procesit zgjedhor.
Vlera e ofertës fituese në këtë procedurë ishte 16.49 milionë lekë, ndërsa edhe në këtë rast kompania rezultoi e vetmja që paraqiti ofertë.
Në total, dy kontratat e siguruara nga “Vitanet Albania” arrijnë në rreth 30.9 milionë lekë pa TVSH, ose mbi 300 mijë euro.
Ajo që e bën edhe më të diskutueshme përzgjedhjen është historiku i pronarit të kompanisë, Sokol Topçiu, emri i të cilit është përmendur më parë në disa çështje të hetuara nga organet ligjzbatuese.
Topçiu është ndaluar në vitin 2021, ndërsa aktiviteti i tij tregtar është lidhur me hetime për kontrabandë dhe problematika të tjera në sektorin farmaceutik.
Emri i tij është përmendur gjithashtu në lidhje me tenderat e zhvilluar gjatë pandemisë së COVID-19, përfshirë procedura të klasifikuara si sekrete, të cilat janë shoqëruar me dyshime për parregullsi dhe favorizime.
Një tjetër çështje e lidhur me aktivitetin e kompanisë së tij ka qenë tregtimi i një medikamenti të njohur si “helmi i gjarprit”, për të cilin janë ngritur problematika lidhur me regjistrimin dhe procedurat e blerjes nga institucionet shëndetësore.
Megjithatë, pavarësisht këtij historiku, biznesmeni ka vijuar aktivitetin me kontrata publike, tashmë edhe në sektorin e furnizimeve zgjedhore.
Sipas të dhënave të Qendrës Kombëtare të Biznesit, në maj të vitit 2025 shoqëria “Farma Net Albania” ndryshoi emrin në “Vitanet Albania”.
Pra, nuk bëhet fjalë për një kompani të re, por për të njëjtin subjekt tregtar që ka vijuar aktivitetin me një emërtim tjetër.
Kompania ushtron aktivitet në sektorin farmaceutik, përfshirë tregtimin dhe shpërndarjen e barnave, ndërsa tashmë ka siguruar edhe kontrata për materiale zgjedhore.
Bilanci financiar i vitit 2025 tregon se shoqëria ka deklaruar një fitim prej 46.27 milionë lekësh, ose afërsisht gjysmë milioni euro.
Ndërkohë, dy tenderat e fundit të KQZ-së ngrenë pyetje mbi mënyrën e zhvillimit të garave dhe kriteret e përzgjedhjes së operatorëve ekonomikë.
Në të dyja procedurat, kompania e Topçiut ka rezultuar praktikisht pa konkurrencë në ofertat financiare, ndërsa institucioni i drejtuar nga Celibashi i ka besuar furnizimin me dy prej materialeve të rëndësishme për administrimin e zgjedhjeve.
Mbetet e paqartë përse procedurat nuk kanë tërhequr më shumë oferta konkurruese dhe nëse KQZ ka kryer verifikime të posaçme mbi historikun e operatorit fitues.
Me zgjedhjet vendore të vitit 2027 në horizont, Komisioni Qendror i Zgjedhjeve po shpenzon miliona lekë për përgatitjen e procesit, ndërsa kontratat e dhëna të njëjtit subjekt shtojnë pikëpyetjet mbi transparencën dhe konkurrencën në përdorimin e fondeve publike. /gazetajone
Lexo edhe:
Plasi/ Sokol Balla i përgatit “puç” Eni Vasilit menjëherë pasi u bë pjesë e Top Channel, zbardhet kërkesa e tij e papritur
Botox kontrabandë/ Si po lulëzon sektori i bukurisë estetike me produkte kontrabandë dhe të pakontrolluara
Celibashi dështon me sukses, emigrantët bojkotojnë masivisht platformën e tij për zgjedhjet
