Avioni që transportonte presidentin ukrainas Volodymyr Zelensky nga Moldavia drejt Oslos ishte shumë pranë një incidenti me një dron, bëri të ditur kryeministri norvegjez Jonas Gahr Store.
Store tha për transmetuesin publik norvegjez NRK se avioni me Zelenskyn “pothuajse u godit nga një dron” gjatë ngritjes nga Moldavia. Kryeministri nuk dha detaje të tjera për incidentin dhe nuk sqaroi se kujt i përkiste droni.
Zelensky kishte udhëtuar drejt Norvegjisë për të marrë pjesë në funeralin e Mbretit Harald V. Gjatë qëndrimit në Oslo, ai zhvilloi takime me kryeministrin Store, ministrin e Financave Jens Stoltenberg dhe ministrin e Jashtëm Espen Barth Eide.
Bisedimet u përqendruan te mbështetja ushtarake e Norvegjisë për Ukrainën, veçanërisht te sistemet e mbrojtjes ajrore, si dhe te ndihma civile. Store tha se Zelensky i kishte treguar se kishte kaluar një natë të vështirë, duke qëndruar në telefon dhe duke marrë informacione për vendet ku kishin goditur raketat.
“Është një situatë shumë dramatike dhe lë një përshtypje të fortë”, tha kryeministri norvegjez.
Pas funeralit, Zelensky u largua nga Norvegjia dhe udhëtoi drejt Kanadasë, ku pritej të zhvillonte takime me liderë të vendit.
Store tha gjithashtu se Norvegjia dhe Ukraina po shqyrtojnë mundësinë e bashkëpunimit për sistemet e mbrojtjes ajrore. Sipas tij, qëllimi është jo vetëm të sigurohen sisteme për Ukrainën, por edhe të krijohet një zgjidhje industriale që do t’i mundësonte Ukrainës t’i prodhojë vetë ato.
“Thënë thjesht, ata kanë vrima në çati”, u shpreh Store, duke iu referuar nevojës së madhe të Ukrainës për mbrojtje kundër sulmeve ajrore.
