Administrata Trump nuk e kundërshtoi nismën e udhëhequr nga Britania e Madhe për vendosjen e sanksioneve të reja ndaj vendbanimeve izraelite në Bregun Perëndimor.
Sipas zyrtarëve amerikanë dhe diplomatëve perëndimorë, të cituar nga Axios, qëndrimi i Shtëpisë së Bardhë sinjalizon pakënaqësi ndaj politikës së qeverisë së Benjamin Netanyahut në këtë territor.
Londra njoftoi sanksione ndaj individëve dhe entiteteve të përfshira në ndërtimin e vendbanimeve, si dhe ndalimin e importeve nga vendbanimet izraelite. Masa u ndërmor pas vendimit të qeverisë Netanyahu për të avancuar ndërtimin në zonën E1, një territor strategjik që, sipas kritikëve, do të ndante Bregun Perëndimor dhe do të vështirësonte krijimin e një shteti të ardhshëm palestinez.
Nismës britanike iu bashkuan edhe 11 vende të tjera perëndimore, mes tyre Kanadaja, Franca, Spanja dhe Suedia.
Ndërkohë, Sekretari amerikan i Shtetit, Marco Rubio, nuk e dënoi vendimin britanik, pasi deklaroi se Uashingtoni ndan shqetësimin për stabilitetin dhe rritjen e tensioneve në Bregun Perëndimor.
Shtëpia e Bardhë gjithashtu u distancua nga kritikat e ambasadorit amerikan në Izrael, Mike Huckabee, duke sqaruar se deklaratat e tij kundër Britanisë nuk ishin koordinuar me administratën, sipas Axios.
Lexo edhe:
Izraeli dhe Irani shkëmbejnë sulme! Trump thirrje Netanyahut: Mos u hakmerr
Prapaskenat/ Si u ‘përzu’ Zelensky nga Shtëpia e Bardhë pas sherrit me Trump, kë telefonoi presidenti ukrainas pas largimit
Trump distancohet nga sulmi i Izraelit në Katar: Veprim i papërshtatshëm ndaj një aleati të ngushtë të SHBA
