Ndërkohë që lufta në Lindjen e Mesme po përshkallëzohet, pyetja që shtrohet shpesh është pse Shtetet e Bashkuara nuk kanë nisur ende një operacion tokësor në Iran.
Përgjigja nuk është thjesht strategjike, por ndërlidhet ngushtë me gjeografinë, historinë dhe kompleksitetin ushtarak të vendit.
Çështjet kryesore janë disa.
Sfida e terrenit
Irani është një vend i madh dhe i komplikuar gjeografikisht. Ai është i rrethuar nga vargmale të fuqishme: Zagros në perëndim dhe Alborz në veri.
Këto male nuk janë thjesht peizazhe mahnitëse, por pengesa natyrore të cilat çdo ushtri do të duhet t’i përballojë.
Korridoret malore janë të ngushta, të lehta për t’u mbajtur nën sulme të vazhdueshme dhe të vështira për të siguruar furnizimet dhe logjistikën.
Historia ka treguar këtë në mënyrë të qartë: gjatë Luftës Iran-Irak në vitet 1980, Ushtria e Saddam Husseinit u përpoq të depërtonte në Iran, por ngeci shpejt në male dhe nuk arriti të avanconte thellë.
Një vend i madh me një forcë të organizuar
Përveç terrenit sfidues, Irani është një vend me një sipërfaqe të madhe dhe një popullsi të konsiderueshme.
Forcat e tija ushtarake janë të strukturuara dhe të përgatitura për mbrojtje të thellë territoriale.
Një pushtim tokësor do të kërkonte mobilizimin e mijëra trupave, qindra miliarda dollarëve buxhet dhe një përballje të gjatë me një kundërshtar të fuqishëm dhe të motivuar.
Një veprim i tillë rrezikon gjithashtu të përhapet në rajon, duke e kthyer konfliktin në një luftë më të gjerë rajonale.
Strategjia amerikane
Për këto arsye, Shtetet e Bashkuara kanë përqendruar aktivitetin e tyre ushtarak kryesisht në sulme ajrore dhe raketore, duke synuar goditjen e kapaciteteve ushtarake dhe infrastrukturore të Iranit pa u përfshirë në një konflikt tokësor të gjatë dhe të pasigurt.
Strategjia është e qartë: të goditen elementët kyç të forcës së armëve iraniane, duke ruajtur jetët e ushtarëve dhe duke shmangur një përshkallëzim të pakontrolluar të konfliktit.
Një perspektivë e gjerë
Ekspertët e sigurisë paralajmërojnë se një ndërhyrje tokësore në Iran nuk do të ishte vetëm sfiduese nga ana logjistike, por do të kishte pasoja të mëdha politike dhe ekonomike globale.
Konflikti mund të përhapet në Lindjen e Mesme, të rrisë çmimet e energjisë, të destabilizojë vendet fqinjë dhe të çojë në një përplasje më të drejtpërdrejtë me fuqitë e tjera si Rusia dhe Kina.
Në këto kushte, përdorimi i forcës ajrore dhe raketore mbetet alternativa më e qëndrueshme dhe e menaxhueshme për SHBA-të, ndërsa një operacion tokësor konsiderohet ende jashtë mundësive praktike dhe të sigurt.
