Dokumentet hetimore të administruara nga autoritetet belge dhe spanjolle në kuadër të dosjes së koduar “ARUBA” hedhin dritë mbi materiale të sekuestruara nga telefonat e personave nën hetim, ku shfaqen edhe fotografi dhe plane të projektit turistik “Green Coast” në Palasë.
Sipas materialit hetimor, nga ekspertimi i pajisjeve celulare të personave të përfshirë në hetim janë gjetur të dhëna që lidhen me investime në kompleksin “Green Coast”. Në një nga pajisjet e sekuestruara, hetuesit kanë identifikuar profilin “Ervin Kajno”, i lidhur me një numër telefoni, ndërsa në dokument thuhet se emri përkon me atë të Drejtorit të Projekteve Korporative të BALFIN Group.
Dosja evidenton se në telefonat e sekuestruar janë gjetur fotografi, video dhe materiale të shumta që lidhen me projekte ndërtimi dhe zhvillime tokash. Sipas hetuesve, një pjesë e konsiderueshme e këtyre materialeve rezulton të jetë e njëjtë në pajisje të ndryshme, çka ka ngritur dyshime për shkëmbim të vazhdueshëm informacioni mes personave nën hetim.
Në komunikimet e analizuara nga platforma e koduar Sky ECC, hetuesit përmendin shkëmbimin e imazheve mes përdoruesve të identifikuar si Ardian Zykaj dhe Alfredo Hamzai. Sipas dosjes, këto materiale lidhen jo vetëm me aktivitetin e dyshuar të trafikut të narkotikëve, por edhe me hetimin mbi investime që po verifikohen si pjesë e dyshimeve për pastrim të produkteve të veprës penale.
Në një tjetër episod të dokumentuar, Artur Shehu i dërgon Arben Ismailajt fotografi që, sipas përshkrimit në dosje, paraqesin një projekt ndërtimi paralel me kompleksin “Green Coast”. Pikërisht këto materiale janë administruar nga prokurorët belgë si pjesë e provave të mbledhura në hetimin ndërkombëtar.
Dokumenti nuk ngre akuzë penale ndaj Ervin Kajnos dhe nuk konkludon për përgjegjësi të tij. Ai e përmend emrin në kontekstin e materialeve të gjetura në pajisjet e sekuestruara dhe të identifikimit të profilit që, sipas hetuesve, përkon me Drejtorin e Projekteve Korporative të BALFIN Group. Hetimet mbi këtë çështje vijojnë në kuadër të bashkëpunimit ndërkombëtar mes autoriteteve belge, spanjolle dhe shqiptare.
Lexo edhe:
Dosja “Black Eagle”, fotot e “Green Coast II”, parcelat për ndërtim dhe bisedat për vila në jug të Shqipërisë
Rojet e oligarkut Samir Mane gjakosin banorët e Dukatit për t’i vjedhur ujin që e do për Green Coast
BKH i bastisi zyrën dhe i sekuestroi celularin, a do t’i shpëtojë Samir Mane edhe dosjes së re të SPAK ku përfshihen edhe trafikantë kokaine dhe SMS për Green Coast në Palasë ?
