Djegia e pallatit pranë kryqëzimit të Farmacisë numër 10 në Tiranë ka rikthyer pikëpyetjet mbi rolin e institucioneve që kanë detyrimin të garantojnë sigurinë e qytetarëve dhe të investimeve të tyre në blerjen e banesave.
Për të kuptuar të gjithë procedurën që ndjek një ndërtim deri në momentin kur pajiset me certifikatën e pronësisë nga Agjencia Shtetërore e Kadastrës, specialistë të fushës shpjegojnë se sipas legjislacionit në fuqi në Shqipëri, kompania ndërtuese ka detyrimin të kontraktojë një studio private ose një specialist privat për kolaudimin e objektit.
Raporti i kolaudimit i dërgohet më pas institucionit që ka dhënë lejen e ndërtimit, i cili mund të jetë bashkia përkatëse ose Agjencia e Zhvillimit të Territorit. Pas dorëzimit të raportit, ky institucion ka detyrimin të kontrollojë objektin në përputhje me përmbajtjen e kolaudimit.
Vetëm pasi kryhen verifikimet dhe konfirmohet se janë zbatuar të gjitha standardet teknike dhe ligjore, institucioni përkatës i jep kompanisë certifikatën e përdorimit të objektit. Me këtë dokument, ndërtuesi aplikon më pas në Agjencinë Shtetërore të Kadastrës për të nxjerrë certifikatën e pronësisë për pallatin dhe më pas për secilin apartament.
Në rastin konkret bëhet fjalë për një objekt të ndërtuar nga shoqëria “Arlis Ndërtim”. Leja e ndërtimit nr. X-28625/7 është dhënë për realizimin e një godine banimi, shërbimi dhe hotelerie me lartësi 2, 8, 9, 10 dhe 12 kate mbi tokë, si edhe me 2 kate parkim nëntokë, e vendosur në rrugën “E Dibrës”, pranë Unazës.
Objekti ka qenë fillimisht i pajisur me leje ndërtimi nga Bashkia Tiranë. Në vitin 2021, subjekti ndërtues ka kryer vetëdeklarim pranë ASHK Tirana Veri për sipërfaqe shtesë të realizuara në kundërshtim me lejen e ndërtimit, në emër të shoqërisë.
Në vijim, subjekti “Arlis Ndërtim” është pajisur me Vendim për Leje Legalizimi dhe më pas me Certifikatë Pronësie për të gjithë objektin nga ASHK Tirana Veri. Në përfundim, objekti rezulton një ndërtesë e hipotekuar, e pajisur me dokumentacion të plotë pronësie për të gjithë ndërtimin.
Ndërkohë, specialistët e pyetur për rastin konkret të pallatit te Farmacia 10 shprehen se në këtë objekt dyshohet të jetë përdorur shkumë polistireni në fasadë. Sipas tyre, ky material është i djegshëm dhe mund të ketë favorizuar përhapjen e flakëve në të gjithë strukturën e pallatit.
Ata sqarojnë se ekzistojnë edhe variante të këtij materiali që janë rezistente ndaj zjarrit, por në këtë rast dyshohet se nuk është përdorur një i tillë. Specialistët theksojnë se në shumë ndërtesa, përfshirë edhe në vende si Shtetet e Bashkuara të Amerikës, përdoret polistiren me karakteristika të padjegshme.
Sipas tyre, në raste të tilla alternativa më e sigurt do të ishte përdorimi i materialeve rezistente ndaj zjarrit, si leshi i gurit, i cili konsiderohet standard në fasadat e ventiluara dhe përdoret pikërisht për të penguar përhapjen e flakëve.
Në këtë kontekst, zjarri i sotëm nuk shihet thjesht si një incident i izoluar, por si një alarm serioz për mënyrën se si po ndërtohet dhe kontrollohet qyteti. Kur ndërtesat marrin leje, kolaudohen, legalizohen dhe në fund hipotekohen si objekte të sigurta, përgjegjësia për sigurinë nuk mund të mbetet vetëm në letër.
Në një treg ku apartamentet shiten me çmime gjithnjë e më të larta, qytetarët presin që pas këtyre çmimeve të ketë edhe një standard real sigurie. Në të kundërt, çdo zjarr i tillë rrezikon të kthehet jo vetëm në një incident teknik, por në provën më të qartë të boshllëqeve në sistemin e kontrollit të ndërtimeve.
Lexo edhe:
Raportimet mbi lidhjet e dyshuara të Vuçiç me krimin e organizuar ngrenë pikëpyetje në SHBA
Hetimet ngrenë pikëpyetje për cilësinë e Tunelit të Llogorasë! Mesazhet alarmuese nga supervizori grek: “Po hidhet beton pa çelik! Ervis, nuk është thjesht një vrimë…”
“Nuk kam asnjë energji për të urryer një shpirt” Beatrix ndan një mesazh të rëndësishëm me të gjithë
